Whakaahua
Tēnei kupu o ‘whakaahua’, e hāngai ana ki te putanga o tētahi mana ki te Ao. Hei tauira, tērā ngā whakairo e tū tū nei i ō tātou whare tupuna. Ehara i te mea, he tohu whakamaharatanga noa iho ērā rākau nei, engari, ko ngā tūpuna tonu e whakaahua mai nei, e puta mai nei, e hoki mai nei i ō tātou whare tūpuna. Kei te whare tapere ka kitea tēnei whakaaro i te whakataukī mō te wahine kua eke nei tōna tū, kua rangatira tāna kawe i ngā kanikani, i ngā haka, i ngā waiata o te whare tapere. Arā tōna whakataukī e mea nei: Ko Hineruhi koe, nāna i tū te ata hāpara. Arā, inā ka rangatira te haka a te wahine, ka kiia ko Hineruhi tonu tēnei e whakaahua mai nei i taua wāhine i tū nei ki te haka. Ehara i te mea, kei te āhua rite te wahine nei ki a Hineruhi. Kao. Ko Hineruhi tonu tēnei e whakaahua mai ne i taua wahine haka nei, ā, kua puta tēnei mana ki te Ao.